Cúlra

Is é ACRES beart náisiúnta nua na haeráide agra-comhshaoil (AECM) a bheidh ar fáil do bhreis agus 30,000 feirmeoir ar fud na hÉireann ón mbliain 2023 ar aghaidh. Trí úsáid a bhaint as cur chuige a bhunaítear ar ghnáthóga, a dhéantar trí mheascán de ghníomhartha a bhunaítear ar thorthaí agus ar shaintreoracha, is éard is aidhm le ACRES ná torthaí feabhsaithe a bhaint amach sa bhithéagsúlacht, san aeráid, i gcaighdeán an aeir agus i gcaighdeán an uisce. Trí shamhailchroschineálach íocaíochta tabharfar luach saothair agus dreasacht d’fheirmeoirí chun staid chomhshaoil a bhfeirmeacha a chothú agus a fheabhsú.

Tá dhá chur chuige faoi scéim ACRES:

• cur chuige Ginearálta ACRES ina bhfuil raon beart á thairiscint d’fheirmeoirí aonair (spriocdhírithe agus ginearálta araon); agus

• cur chuige Comhoibrithe ACRES, atá ar fáil d’fheirmeoirí in ocht gceantar thíreolaíocha ardtosaíochta, a dhéanfaidh an rogha bearta a ghlacadh, chomh maith le gníomhaíochtaí saincheaptha feirme agus tírdhreacha.

Beidh cúnamh ó Fhoireann Áitiúil Tionscadail Chomhoibrithe (CP) ar fáil do na feirmeoirí a bheidh rannpháirteach sa chur chuige Comhoibrithe, agus cabhróidh an Fhoireann seo le cur i bhfeidhm na scéime ar an leibhéal áitiúil. Ceapadh Wetland Surveys Ireland i gcomhpháirtíocht le Tionscadal na nDiúilicíní Péarla chun cion feidhme na foirne áitiúla CP a chomhlíonadh in dhá cheann de na hocht gcrios CP (Iarthuaisceart Chonnacht agus Conamara-Deisceart Mhaigh Eo), ar a dtugtar le chéile ACRES Iarthar Chonnacht.

Foghlaim a thuilleadh eolais trí fhéachaint ar léiriú gréasáin ACRES

Buneolas ar ACRES Iarthar Chonnacht

Áirítear le ACRES Iarthar Chonnacht crios Thionscadal Comhoibrithe Iarthuaisceart Chonnacht agus crios Thionscadal Comhoibrithe Chonamara-Deisceart Mhaigh Eo.

Tá ACRES Iarthar Chonnacht á riaradh ag foireann áitiúil tionscadail. Is é cúram tosaigh na foirne tionscadail ná Plean Áitiúil Gníomhaíochta a fhorbairt ina leagfar amach cuspóirí áitiúla agus an chaoi a mbainfear iad seo amach le linn oibriú na scéime. Tá sé mar aidhm ag an bPlean Áitiúil Gníomhaíochta a chinntiú go ndéanfar an scéim a chur in oiriúintchun an freastal is fearr a dhéanamh ar riachtanais chomhshaoil an cheantair áitiúil, agus tréithe talmhaíochta agus comhshaoil an tírdhreacha á gcur san áireamh. Rachaidh an fhoireann i dteagmháil leis an bpobal áitiúil feirmeoireachta le linn fhorbairt an phlean. Ina dhiaidh seo, is é an príomhchion feidhme a bheidh ag foireann an tionscadail ná tacú le feirmeoirí agus lena gcomhairleoirí ó thaobh torthaí feabhsaithe comhshaoil a sholáthar ar fud an réigiúin. Tá raon leathan saineolais ar fáil ónár bhfoireann sa talmhaíocht agus san éiceolaíocht chun a chinntiú gur féidir linn sainchomhairle a chur ar fáil de réir mar is gá.

Ar chúiseanna oibriúcháin agus chun ábharthacht áitiúil a choinneáil, tá sé cheantar áitiúla leagtha amach againn laistigh de ACRES Iarthar Chonnacht:

• ACRES Iarthar Chonnacht - Iorras

• ACRES Iarthar Chonnacht - Sliabh Gamh agus Loch Con

• ACRES Iarthar Chonnacht - Acaill agus Néifinn

• ACRES Iarthar Chonnacht - Conamara Thuaidh agus An Oirimh

• ACRES Iarthar Chonnacht - An Choirib agus Measca

• ACRESIarthar Chonnacht- Conamara Theas

Sannfar oifigigh áitiúla tionscadail dár gcuid chun tacú le feirmeoirí agus le comhairleoirí feirme i ngach ceann de na ceantair seo. Taispeántar sa léarscáil anseo thíos fairsinge gach ceantair áitiúil laistigh de ACRES Iarthar Chonnacht.

Conas a bheith páirteach

Is cóir d'fheirmeoirí ar mian leo a bheith páirteach in ACRES teagmháil a dhéanamh lena gComhairleoir atá faofa i leith ACRES agus a fhéadfaidh iarratas a chur isteach ar a son.

Chun teacht ar a thuilleadh eolais agus chun a fháil amach conas iarratas a dhéanamh le bheith páirteach sa scéim, féach na sonraí ar láithreán gréasáin na Roinne Talmhaíochta, Bia agus Mara anseo.

Cad iad na dúshláin chomhshaoil a dtabharfar aghaidh orthu?

• Cion na talmhaíochta d'astaíochtaí na ngás ceaptha teasa (GCT)

• Acmhainneacht na n-ithreacha mar linn charbóin nó mar fhoinse astaíochta

• Úsáid an fhuinnimh sna córais feirme

• Astaíochtaí amóinia a bheith ag méadú

• Caighdeán an uisce a bheith ag laghdú

• Torthúlacht na hithreach a bheith easnamhach

• An brú ón talmhaíocht ar acmhainní nádúrtha na hÉireann

• An stádas neamhfhabhrach nó meathlach atá ag formhór ghnáthóga agus thírdhreacha sainithe na hÉireann

• Easpa limistéar foraoise faoi chosaint

• Caomhnú na bithéagsúlachta

• Tírdhreacha agus gnéithe nádúrtha ar leith a chosaint

• Easpa beart chun oiriúnú don athrú aeráide